ପାକିସ୍ତାନରେ ପୁଣି ବଡ଼ ଧରଣର ବିସ୍ଫୋରଣ ହୋଇଛି । ଖାଇବର ପଖତୁନଖ୍ୱାର ଡେରା ଇସ୍ମାଇଲ ଖାନ ଅଞ୍ଚଳରେ ଏକ ପୋଲିସ ଚେକ୍ ପୋଷ୍ଟକୁ ଟାର୍ଗେଟ କରି ଏହି ବିସ୍ଫୋରଣ ହୋଇଛି । ଏହି ବିସ୍ଫୋରଣରେ ୧୩ ଜଣଙ୍କ ମୃତ୍ୟୁ ହୋଇଥିବାବେଳେ ଅତି କମରେ ୩୫ ଜଣ ଆହତ ହୋଇଛନ୍ତି । ମୃତକଙ୍କ ମଧ୍ୟରେ ଜଣେ ଶିଶୁ ଓ ଦୁଇଜଣ ମହିଳା ଥିବା ସୂଚନା ମିଳିଛି ।
ସୂଚନାନୁଯାୟୀ, ଖାଇବର ପଖତୁନଖ୍ୱା ଓ ବାଲୁଚିସ୍ତାନ ସୀମା ନିକଟ ଡେରା ଇସ୍ମାଇଲ ଖାନର ଦରାଜିନ୍ଦା ଅଞ୍ଚଳରେ ଏହି ବିସ୍ଫୋରଣ ଘଟିଛି । ’ଅମନ ମେଳା’ ପୋଲିସ ଚେକ୍ ପୋଷ୍ଟରେ ଏହି ଘଟଣା ଘଟିଥିବା ଜଣାପଡ଼ିଛି । ପ୍ରଦେଶ ଜରୁରୀକାଳୀନ ସେବାର ମୁଖପାତ୍ର ବିଲାଲ ଫୈଜି କହିଛନ୍ତି ଯେ ଖାଇବର ପଖତୁନଖ୍ୱା ପ୍ରଦେଶର ଡେରା ଇସମାଇଲ ଖାନ ଜିଲ୍ଲାରେ ହୋଇଥିବା ଏହି ଆକ୍ରମଣରେ ବିସ୍ଫୋରକ ଭର୍ତ୍ତି ଏକ ଗାଡି ବ୍ୟବହାର କରାଯାଇଥିଲା । ବିସ୍ଫୋରଣରେ ପୋଲିସ କର୍ମଚାରୀଙ୍କ ସହ କଷ୍ଟମ୍ସ ଅଧିକାରୀ ଏବଂ ସାଧାରଣ ନାଗରିକ ମଧ୍ୟ ଆହତ ହୋଇଛନ୍ତି । ବିସ୍ଫୋରଣ ପରେ ତୁରନ୍ତ ଆରମ୍ଭ ହୋଇଥିଲା ଉଦ୍ଧାର କାର୍ଯ୍ୟ ।
ରେସ୍କ୍ୟୁ ଟିମ୍ ଘଟଣାସ୍ଥଳରେ ପହଞ୍ଚି ଧ୍ୱଂସାବଶେଷ ତଳେ ଫସିଥିବା ଲୋକଙ୍କୁ ଉଦ୍ଧାର କରିଥିଲେ। ପାକିସ୍ତାନୀ ତାଲିବାନ, ଯାହାକୁ ସରକାରୀ ଭାବରେ ତେହେରିକ-ଏ-ତାଲିବାନ ପାକିସ୍ତାନ କିମ୍ବା TTP ଭାବରେ ଜଣାଶୁଣା, ଏହି ଆକ୍ରମଣ ପାଇଁ ଦାୟୀ ବୋଲି ଦାବି କରିଛି । ସାମ୍ପ୍ରତିକ ବର୍ଷଗୁଡ଼ିକରେ ପାକିସ୍ତାନରେ ଉଗ୍ରବାଦୀ ହିଂସା ବୃଦ୍ଧି ପାଇଛି । ଏଥିସହ ବିସ୍ଫୋରଣର ପ୍ରକୃତ କାରଣ ଏବଂ ଘଟଣାର ପ୍ରକୃତି ନିର୍ଦ୍ଧାରଣ ପାଇଁ ବୋମା ନିରୋଧକ ଦଳ ମଧ୍ୟ ଘଟଣାସ୍ଥଳରେ ତଦନ୍ତ ଆରମ୍ଭ କରିଛି ।
ଅନ୍ୟପଟେ ପାକିସ୍ତାନର ରାଷ୍ଟ୍ରପତି ଆସିଫ ଅଲ୍ଲୀ ଜର୍ଦ୍ଦାରୀ ଏବଂ ପ୍ରଧାନମନ୍ତ୍ରୀ ଶାହବାଜ ସରିଫ ଏହି ଆକ୍ରମଣକୁ ନିନ୍ଦା କରିଛନ୍ତି ଏବଂ ପୀଡିତ ପରିବାର ପ୍ରତି ସମବେଦନା ପ୍ରକାଶ କରିଛନ୍ତି । ଜର୍ଦ୍ଦାରୀ ସାଧାରଣ ନାଗରିକ ଏବଂ ସୁରକ୍ଷା କର୍ମୀଙ୍କୁ ଟାର୍ଗେଟ କରିବା ଘଟଣାକୁ “ଅତ୍ୟନ୍ତ ନିନ୍ଦନୀୟ” ବୋଲି କହିଛନ୍ତି ଏବଂ ପାକିସ୍ତାନୀ ତାଲିବାନ ବିରୁଦ୍ଧରେ କଠୋର କାର୍ଯ୍ୟାନୁଷ୍ଠାନ ଦାବି କରିଛନ୍ତି । ଏହା ବ୍ୟତୀତ ଅଭିଯୋଗ କରିଛନ୍ତି ଯେ, ଏହି ଗୋଷ୍ଠୀ ବିଦେଶୀ ସମର୍ଥନରେ “ଘୃଣ୍ୟ ଏବଂ ବର୍ବର କାର୍ଯ୍ୟ” କରୁଛି ।
ପାକିସ୍ତାନୀ ଅଧିକାରୀମାନେ ଆଫଗାନ ତାଲିବାନ ସରକାର ଉପରେ ବାରମ୍ବାର ଅଭିଯୋଗ କରିଛନ୍ତି ଯେ ସେମାନେ TTP ସଦସ୍ୟମାନଙ୍କୁ ଆଫଗାନ ଅଞ୍ଚଳରୁ କାର୍ଯ୍ୟ କରିବାକୁ ଅନୁମତି ଦେଉଛନ୍ତି । ସେମାନେ କାବୁଲ ସୀମାପାର ଆକ୍ରମଣ ବନ୍ଦ କରିବାକୁ ଦାବି କରିଛନ୍ତି । ତଥାପି, ଆଫଗାନ ଅଧିକାରୀମାନେ ଅନ୍ୟ ଦେଶ ବିରୁଦ୍ଧରେ ଆକ୍ରମଣ ପାଇଁ ସେମାନଙ୍କ ଅଞ୍ଚଳ ବ୍ୟବହାର କରିବାକୁ ଅନୁମତି ଦେଉଥିବା କଥାକୁ ଅସ୍ୱୀକାର କରିଛନ୍ତି ।
