ବଲିଉଡ ଅଭିନେତା ଅଜୟ ଦେବଗନ ‘ଦୃଶ୍ୟମ-୩’ର ବକ୍ସ ଅଫିସ ରେକର୍ଡକୁ ନେଇ ଖବରରେ ରହିଥିବାବେଳେ ତାଙ୍କ ପତ୍ନୀ କାଜୋଲ ସମଗ୍ର ପରିବାର ସହିତ ନବରାତ୍ରି ଉତ୍ସବରେ ବୁଡ଼ି ରହିଛନ୍ତି । ଏହାରି ମଧ୍ୟରେ କିନ୍ତୁ ସେ ବ୍ୟକ୍ତିଗତ ଭାବେ ରିୟଲ ଲାଇଫ୍ରେ ଆଇନଗତ ଏବଂ ପ୍ରଶାସନିକ କ୍ଷେତ୍ରରେ ସମସ୍ୟାରେ ପଡ଼ିଛନ୍ତି । ମୁମ୍ବାଇ ମ୍ୟୁନିସିପାଲ କର୍ପୋରେସନ (BMC) ଅଜୟ ଦେବଗନଙ୍କ ବଙ୍ଗଳା ଉପରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରିଛି ଏବଂ ବଙ୍ଗଳାର କିଛି ଅଂଶ ଭାଙ୍ଗି ଦିଆଯାଇଛି । ଆବଶ୍ୟକୀୟ ଅନୁମୋଦନ ବିନା ଏଠାରେ ନିର୍ମାଣ ଏବଂ ପରିବର୍ତ୍ତନ କରାଯାଉଥିଲା ବୋଲି ଅଭିଯୋଗ ହୋଇଛି ।
ରିପୋର୍ଟ ଅନୁସାରେ, ପୂର୍ବରୁ ବଙ୍ଗଳାରେ ଚାଲିଥିବା ନିର୍ମାଣକୁ ବନ୍ଦ କରିବାକୁ ବିଏମସି ଦ୍ବାରା ନୋଟିସ୍ ଜାରି କରାଯାଇଥିଲା । ନୋଟିସ ସତ୍ତ୍ୱେ କାମ ବନ୍ଦ ହୋଇନଥିଲା, ଯାହା ଫଳରେ ଏବେ ବିଏମସି ଏହି କାର୍ଯ୍ୟାନୁଷ୍ଠାନ ଗ୍ରହଣ କରିଛି । ଅଜୟ ଦେବଗନଙ୍କ ବଙ୍ଗଳା ମୁମ୍ବାଇର ଜୁହୁ ଅଞ୍ଚଳର କପୋଲ କୋ-ଅପରେଟିଭ୍ ହାଉସିଂ ସୋସାଇଟିରେ ଅବସ୍ଥିତ। ଏହାର କ୍ଷେତ୍ରଫଳ ପ୍ରାୟ ୭,୮୦୨ ବର୍ଗଫୁଟ ବୋଲି ରିପୋର୍ଟ କରାଯାଇଛି। ମ୍ୟୁନିସିପାଲ କର୍ପୋରେସନ ଅନୁଯାୟୀ, ବଙ୍ଗଳାରେ ବିଭିନ୍ନ ପରିବର୍ତ୍ତନ କରାଯାଉଥିଲା, ଯେଉଁଥିରେ ଭିତର ପରିବର୍ତ୍ତନ, ପାର୍ଟିସନ କାନ୍ଥ ନିର୍ମାଣ, ଝରକା ପରିବର୍ତ୍ତନ ଏବଂ ଅନ୍ୟାନ୍ୟ ନିର୍ମାଣ କାର୍ଯ୍ୟ ଅନ୍ତର୍ଭୁକ୍ତ ଥିଲା । ବିଏମସି କହିଛି ଯେ, ଏହି କାର୍ଯ୍ୟଗୁଡ଼ିକ ପାଇଁ ଆବଶ୍ୟକ ମ୍ୟୁନିସିପାଲଟି ଅନୁମତି ନିଆଯାଇ ନଥିଲା ।
ସେପ୍ଟେମ୍ବର ୧୦ ତାରିଖରେ ମୁମ୍ବାଇ ମ୍ୟୁନିସିପାଲ୍ କର୍ପୋରେସନ୍ ଆଇନର ଧାରା ୩୫୪-ଏ ଅନୁଯାୟୀ ଏକ ଆନୁଷ୍ଠାନିକ ନୋଟିସ୍ ଜାରି କରି ନିର୍ମାଣ କାର୍ଯ୍ୟ ତୁରନ୍ତ ବନ୍ଦ କରିବା ଏବଂ ଆବଶ୍ୟକୀୟ କାଗଜପତ୍ର ଦାଖଲ କରିବାକୁ ନିର୍ଦ୍ଦେଶ ଦିଆଯାଇଥିଲା । ତଥାପି, ମ୍ୟୁନିସିପାଲ୍ କର୍ପୋରେସନ୍ ଅଭିଯୋଗ କରିଛି ଯେ, ନୋଟିସ୍ ଜାରି ହେବା ପରେ ମଧ୍ୟ କାମ ବନ୍ଦ ହୋଇନଥିଲା । ପରବର୍ତ୍ତୀ ସମୟରେ ଅଧିକାରୀମାନେ ଘଟଣାସ୍ଥଳରେ ପହଞ୍ଚି କଥିତ ଅନଧିକୃତ ନିର୍ମାଣଗୁଡ଼ିକୁ ଭାଙ୍ଗିବା ଆରମ୍ଭ କରିଥିଲେ । ଅକ୍ଟୋବର ୧୭ ତାରିଖରେ, ଅଧିକାରୀମାନଙ୍କୁ ହାତୁଡ଼ି ସାହାଯ୍ୟରେ କିଛି ନିର୍ମାଣ ଭାଙ୍ଗିବା ଦେଖାଯାଇଥିଲା ।
