ଦୀର୍ଘ ଦିନର ଅପେକ୍ଷା ପରେ ବଡ଼ ପରଦାକୁ ଆସିଛି ୟଶଙ୍କ ବହୁ ପ୍ରତୀକ୍ଷିତ ଫିଲ୍ମ ‘Toxic’। ୟଶଙ୍କ ଆକ୍ସନ୍ ଅବତାର ସାଙ୍ଗକୁ ଫିଲ୍ମର ବିପୁଳ ବଜେଟ୍ ଏବଂ ହାଇପ୍କୁ ନେଇ ଦର୍ଶକଙ୍କ ମଧ୍ୟରେ ଭଲ ଉତ୍ସାହ ରହିଥିଲା । ତେବେ ଫିଲ୍ମ ଦେଖିବା ପରେ ସେହି ଉତ୍ସାହ ନିରାଶାରେ ପରିଣତ ହୋଇଥିବା ସୋସିଆଲ ମିଡିଆରେ ଚର୍ଚ୍ଚା ହେଉଛି ।
ଫିଲ୍ମଟିକୁ ନେଇ ଦୀର୍ଘ ଦିନ ଧରି ଚର୍ଚ୍ଚା ଚାଲିଥିଲା। ବିଶେଷ କରି ‘KGF’ ପରେ ୟଶ୍ କିଭଳି ନୂଆ ରୂପରେ ଦର୍ଶକଙ୍କ ସାମ୍ନାକୁ ଆସିବେ, ତାହା ଜାଣିବାକୁ ଫ୍ୟାନ୍ମାନେ ଅପେକ୍ଷା କରିଥିଲେ । ଅନ୍ୟପଟେ ନିର୍ଦ୍ଦେଶିକା ଗୀତୁ ମୋହନଦାସଙ୍କ ପୂର୍ବ ଫିଲ୍ମଗୁଡ଼ିକ ଯୋଗୁଁ ମଧ୍ୟ ‘Toxic’କୁ ନେଇ କ୍ୟୁରିଓସିଟି ଥିଲା ।
ମର୍ଣ୍ଣିଂ ଶୋ’ରେ ମଧ୍ୟ ଭଲ ସଂଖ୍ୟାରେ Gen Z ଦର୍ଶକ ସିନେମା ହଲ୍ରେ ପହଞ୍ଚିଥିଲେ। ଫିଲ୍ମ ଆରମ୍ଭ ହେବା ପରେ ୟଶଙ୍କ ଏଣ୍ଟ୍ରି ନିଶ୍ଚିତ ଭାବେ ଦର୍ଶକଙ୍କ ଧ୍ୟାନ ଆକର୍ଷଣ କରିଥିଲା । ତାଙ୍କ ଷ୍ଟାରଡମ୍ ଏବଂ ଆକ୍ସନ୍ରେ ଦମ୍ ଦେଖିବାକୁ ମିଳିଥିଲା। କିନ୍ତୁ ଏହା ପରେ ଫିଲ୍ମର କାହାଣୀ ଓ ସ୍କ୍ରିନ୍ପ୍ଲେ ଦର୍ଶକଙ୍କୁ ନିରାଶ କରିଥିବା ଭଳି ଲାଗିଛି । କିଆରା ଆଡଭାଣୀଙ୍କ ଅଭିନୟ ମଧ୍ୟ ଆଶା ଅନୁସାରେ ପ୍ରଭାବ ପକାଇପାରିନଥିବା କୁହାଯାଉଛି ।
ଫିଲ୍ମରେ ଆକ୍ସନ୍ର ଅଭାବ ନାହିଁ । ଗୁଳି ବର୍ଷୁଛି, ଲଢ଼େଇ ଚାଲିଛି ଏବଂ ୟଶ୍ ନିଜ ଷ୍ଟାର ପାୱାର୍ରେ ପରଦାକୁ ଦଖଲ କରିଛନ୍ତି । ହେଲେ ଆକ୍ସନ୍ ସିନ୍ଗୁଡ଼ିକରେ ଯେଉଁ ‘ମାସ୍ ମୋମେଣ୍ଟ’ ଏବଂ ଦର୍ଶକଙ୍କ ତାଳି-ସିଟି ଆଶା କରାଯାଉଥିଲା, ତାହା ବେଶ୍ କମ୍ ଅନୁଭବ ହୋଇଛି । ଏପରିକି ମର୍ଣ୍ଣିଂ ଶୋ’ରେ ଦର୍ଶକଙ୍କ ଏକ ବଡ଼ ଅଂଶ ପରଦା ବଦଳରେ ମୋବାଇଲ୍ରେ ବ୍ୟସ୍ତ ଥିବା ସୋସିଆଲ ମିଡିଆରେ କୁହାଯାଉଛି । ତିନି ଘଣ୍ଟାରୁ ଅଧିକ ସମୟର ଫିଲ୍ମ ହୋଇଥିବାରୁ ଲୋକେ ବୋର ହେଉଛନ୍ତି ।
କାହାଣୀ, ଗୀତ ଏବଂ କ୍ୟାରେକ୍ଟରାଇଜେସନ୍ ମଧ୍ୟ ଫିଲ୍ମର ଦୁର୍ବଳ ଦିଗ ଭାବେ ସାମ୍ନାକୁ ଆସିଛି । ବଡ଼ ବଜେଟ୍ ସତ୍ତ୍ୱେ ଦର୍ଶକଙ୍କୁ ମନେ ରହିବା ଭଳି ମାସ୍ ସିନ୍ ନାହିଁ । ଫିଲ୍ମର ସବୁଠାରୁ ବଡ଼ ଆକର୍ଷଣ ନିଶ୍ଚିତ ଭାବେ ୟଶଙ୍କ ପରଫର୍ମାନ୍ସ ଏବଂ ଷ୍ଟାର ପାୱାର୍। କିନ୍ତୁ କେବଳ ଷ୍ଟାରଡମ୍କୁ ଭରସା କରି ଏତେ ବଡ଼ ଫିଲ୍ମକୁ ଦର୍ଶକଙ୍କ ସହ ଯୋଡ଼ିବା କଷ୍ଟକର ବିଭିନ୍ନ ରିଭ୍ୟୁରେ କୁହାଯାଉଛି ।
