ମଧ୍ୟପ୍ରଦେଶର ଉଜ୍ଜୟିନୀ ସ୍ଥିତ ପ୍ରସିଦ୍ଧ ଶ୍ରୀ ମହାକାଳେଶ୍ୱର ମନ୍ଦିରରେ ବୁଧବାର ଅପରାହ୍ନରେ ହଙ୍ଗାମା ସୃଷ୍ଟି ହୋଇଛି । କିଛି ଲୋକ ମନ୍ଦିରର ସୁରକ୍ଷା ବ୍ୟବସ୍ଥା ଏବଂ ନିର୍ଦ୍ଧାରିତ ଦର୍ଶନ ବ୍ୟବସ୍ଥାକୁ ଭାଙ୍ଗିବାକୁ ଉଦ୍ୟମ କରିଥିବା ଅଭିଯୋଗ ହୋଇଛି । ଏହି ଘଟଣାର ଭିଡିଓ ମଧ୍ୟ ସାମ୍ନାକୁ ଆସିଛି, ଯେଉଁଥିରେ କିଛି ଲୋକ ନନ୍ଦୀ ହଲ୍ ଆଡ଼କୁ ଆଗକୁ ବଢ଼ୁଥିବା ଦେଖାଯାଉଛି ।
ସୁରକ୍ଷାକର୍ମୀମାନେ ସେମାନଙ୍କୁ ଅଟକାଇବାକୁ ଉଦ୍ୟମ କରୁଥିଲେ ମଧ୍ୟ ଭିଡ଼ ଲଗାତାର ଆଗକୁ ବଢ଼ୁଥିବା ଦେଖାଯାଇଛି । ମନ୍ଦିର ପରିଚାଳନା କମିଟିର କହିବା ଅନୁସାରେ, କିଛି ଉପଦ୍ରବୀ ନନ୍ଦୀ ହଲରେ ଲାଗିଥିବା ବ୍ୟାରିକେଡିଂ ଭାଙ୍ଗି ଦେଇଥିଲେ । ଏହାସହ ମନ୍ଦିରରେ ଥିବା ଦାନ ବାକ୍ସଗୁଡ଼ିକୁ ମଧ୍ୟ ଫିଙ୍ଗି ଦେଇଥିବା ଅଭିଯୋଗ ହୋଇଛି ।
ଭିଡିଓରେ ସୁରକ୍ଷାକର୍ମୀମାନେ ଭିଡ଼କୁ ଅଟକାଇବାକୁ ଉଦ୍ୟମ କରୁଥିବା ଦେଖାଯାଉଛି । ପରିସ୍ଥିତି ନିୟନ୍ତ୍ରଣ ବାହାରକୁ ଯିବା ପରେ ସୁରକ୍ଷାକର୍ମୀ ଓ ପୋଲିସ କିଛି ଲୋକଙ୍କୁ ଘଟଣାସ୍ଥଳରୁ ବାହାର କରିଥିଲେ । ତେବେ କିଛି ସମୟ ପରେ ଅନ୍ୟ କିଛି ଲୋକ ପୁଣି ଏକାଠି ହୋଇ ନନ୍ଦୀ ହଲ୍ ଆଡ଼କୁ ବଢ଼ୁଥିବା ଦେଖାଯାଇଥିଲା ।
ମନ୍ଦିର କମିଟିର ସୂଚନା ଅନୁଯାୟୀ, ଏହି ସମୟରେ ଡ୍ୟୁଟିରେ ଥିବା କର୍ମଚାରୀଙ୍କ ସହ ହାତାହାତି ଓ ମାରପିଟ ମଧ୍ୟ ହୋଇଥିଲା, ଯେଉଁଥିରେ କିଛି ସୁରକ୍ଷାକର୍ମୀ ଆହତ ହୋଇଛନ୍ତି । ଘଟଣାକୁ ମନ୍ଦିର ପ୍ରଶାସନ ଗୁରୁତ୍ୱର ସହ ନେଇଛି ଏବଂ ସମ୍ପୃକ୍ତ ଲୋକଙ୍କୁ ଚିହ୍ନଟ କରି ସେମାନଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ କରାଯାଉଛି ।
ମନ୍ଦିର ପରିଚାଳନା କମିଟି ସ୍ପଷ୍ଟ କରିଛି ଯେ, ଧାର୍ମିକ ଆସ୍ଥାର ଆଳ ଦେଖାଇ ମନ୍ଦିରର ସୁରକ୍ଷା ବ୍ୟବସ୍ଥା ସହ ଛେଡ଼ଛାଡ଼ କରିବା, ବ୍ୟାରିକେଡିଂ ଭାଙ୍ଗିବା, ମନ୍ଦିର ସମ୍ପତ୍ତିକୁ କ୍ଷତି ପହଞ୍ଚାଇବା କିମ୍ବା ସୁରକ୍ଷାକର୍ମୀଙ୍କ ସହ ଦୁର୍ବ୍ୟବହାର କରିବା କୌଣସି ପରିସ୍ଥିତିରେ ଗ୍ରହଣୀୟ ନୁହେଁ । ଭକ୍ତମାନଙ୍କୁ ଦର୍ଶନ ବ୍ୟବସ୍ଥା ବଜାୟ ରଖିବାରେ ସହଯୋଗ କରିବା ସହ ନିର୍ଦ୍ଧାରିତ ମାର୍ଗ ଓ ନିୟମ ମାନି ଶାନ୍ତିପୂର୍ଣ୍ଣ ଭାବେ ବାବା ମହାକାଳଙ୍କ ଦର୍ଶନ କରିବାକୁ ଅପିଲ କରିଛି ।
