ନିକଟରେ ଗୋବିନ୍ଦାଙ୍କ ପୁଅ ଯଶବର୍ଦ୍ଧନ ଆହୁଜା ଏବଂ ଜନି ଲିଭରଙ୍କ ଝିଅ ଜ୍ୟାମି ଲିଭରଙ୍କ ଏକ ଫେକ୍ ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଥିଲା । ଏହା ପରେ ଉଭୟଙ୍କ ବିବାହକୁ ନେଇ ଅଫବାହ ଜୋର ଧରିଥିଲା । ତେବେ ଏହି AI ଭିଡିଓ ଉପରେ ଜ୍ୟାମି ଲିଭର ନିଜେ ମୁହଁ ଖୋଲି ସ୍ପଷ୍ଟୀକରଣ ଦେଇଛନ୍ତି ।
ଜ୍ୟାମି ଲିଭର୍ ଭାଙ୍ଗିଲେ ନିରବତା:
ଲଗାତାର ଫୋନ୍ କଲ୍ ଏବଂ ବିବାହ ନେଇ ଶୁଭେଚ୍ଛା ପାଇବା ପରେ ଜ୍ୟାମି ଲିଭର୍ ନିଜ ଇନଷ୍ଟାଗ୍ରାମରେ ଏକ ଭିଡିଓ ଶେୟାର କରି ସ୍ପଷ୍ଟୀକରଣ ଦେଇଛନ୍ତି । ଜ୍ୟାମି କହିଛନ୍ତି, ମୋ ବିବାହକୁ ନେଇ ଅନେକ ଲୋକ ଚିନ୍ତିତ ଅଛନ୍ତି । ବିବାହ ହେଉଛି କି ନାହିଁ, କେବେ ହେବ ଏନେଇ ଇଣ୍ଟରନେଟରେ ଫେକ୍ AI ଭିଡିଓ ତିଆରି କରାଯାଉଛି । ପ୍ରଥମେ ମୋତେ ଏହା ମଜାଳିଆ ଲାଗିଥିଲା । ମୁଁ ଓ ମୋ କଜିନ୍ମାନେ ଏହି ଭିଡିଓ ପରସ୍ପରକୁ ପଠାଇ ହସୁଥିଲୁ। କିନ୍ତୁ ଏବେ ଲୋକେ ମୋତେ ଫୋନ୍ କରି ବିବାହ ପାଇଁ ଶୁଭେଚ୍ଛା ଜଣାଉଛନ୍ତି ।
ସବୁ ଭିଡିଓ ଫେକ୍:
ଜ୍ୟାମି ଆହୁରି କହିଛନ୍ତି, ଏହି ସମସ୍ତ ଭିଡିଓ ଏବଂ ଏଥିରେ ଦିଆଯାଇଥିବା ତଥ୍ୟ ସମ୍ପୂର୍ଣ୍ଣ ମିଥ୍ୟା । ଏହା ଯୋଗୁଁ ମୋ ପାଇଁ ଅସୁବିଧା ହେଉଛି । ଲୋକଙ୍କୁ ଲାଗୁଛି ଯେ ମୋ ବିବାହ ଠିକ୍ ହୋଇଯାଇଛି । ଏପରିକି ମୋ ପାଇଁ ଆସୁଥିବା ବାସ୍ତବ ବିବାହ ପ୍ରସ୍ତାବ ମଧ୍ୟ ବନ୍ଦ ହୋଇଯାଇଛି । ତେଣୁ ଦୟାକରି ଏପରି କରନ୍ତୁ ନାହିଁ । ସେ ଆହୁରି କହିଛନ୍ତି ଯେ ଯେଉଁମାନେ AI ଭିଡିଓ ତିଆରି କରିଛନ୍ତି, ସେମାନେ ବହୁତ ସୃଜନଶୀଳ । ତେବେ ଏବେ ସେହି ଭିଡିଓଗୁଡ଼ିକୁ ହଟାଇଦେବାକୁ ସେ ଅନୁରୋଧ କରିଛନ୍ତି ।
ଯଶବର୍ଦ୍ଧନଙ୍କ ସହ ସମ୍ପର୍କ କ’ଣ?
ଯଶବର୍ଦ୍ଧନ ଆହୁଜାଙ୍କ ନାଁ ନନେଇ ଜ୍ୟାମି ସ୍ପଷ୍ଟ କରିଛନ୍ତି ଯେ, ଯେଉଁ ବ୍ୟକ୍ତିଙ୍କ ସହ ମୋ ବିବାହ ଖବର ପ୍ରଚାର ହେଉଛି, ସେ ମୋ ସାନ ଭାଇ ଭଳି । ସେ ମୋଠାରୁ ବହୁତ ସାନ । ଆମେ ଏକାଠି ଏକ ଫିଲ୍ମରେ ମଧ୍ୟ କାମ କରୁଛୁ । ତେଣୁ ଏପରି ମିଥ୍ୟା ଭିଡିଓ ତିଆରି କରିବା ଠିକ୍ ନୁହେଁ ।
ଯଶବର୍ଦ୍ଧନ ଆହୁଜା ଖୁବଶୀଘ୍ର ବଲିଉଡରେ ଡେବ୍ୟୁ କରିବାକୁ ଯାଉଛନ୍ତି । ନିର୍ଦ୍ଦେଶକ ସାଜିଦ ଖାନଙ୍କ ଆଗାମୀ ଫିଲ୍ମ ହିରୋ କି ହରୋରିନ୍ ରେ ସେ ମୁଖ୍ୟ ଭୂମିକାରେ ନଜର ଆସିବେ । ଏହି ଫିଲ୍ମରେ ଜ୍ୟାମି ଲିଭର୍, ନିତାଂଶୀ ଗୋୟଲ, ଚଙ୍କି ପାଣ୍ଡେ, ବୃଜେନ୍ଦ୍ର କାଲା ଏବଂ ସିମରତ କୌର ରନ୍ଧାୱା ମଧ୍ୟ ଗୁରୁତ୍ୱପୂର୍ଣ୍ଣ ଭୂମିକାରେ ଅଛନ୍ତି । ଫିଲ୍ମର ସୁଟିଂ ସମୟରେ ଜ୍ୟାମି ଓ ଯଶବର୍ଦ୍ଧନଙ୍କ ମଧ୍ୟରେ ଭଲ ବନ୍ଧୁତ୍ୱ ଗଢ଼ିଉଠିଥିଲା । ଏହି ବନ୍ଧୁତ୍ୱକୁ ସୋସିଆଲ ମିଡିଆରେ ଭୁଲ ଭାବେ ବିବାହ ଅଫବାହର ରୂପ ଦିଆଯାଇଥିଲା ।
