ପଶ୍ଚିମବଙ୍ଗର ମାଲଦା ମେଡିକାଲ କଲେଜ ଏବଂ ହସ୍ପିଟାଲରେ ଅଗଷ୍ଟ ମାସରେ ନବଜାତ ଶିଶୁଙ୍କ ମୃତ୍ୟୁ ସଂଖ୍ୟା ୭୫ ପାର କରିଛି । ଗୋଟିଏ ଦିନରେ ୧୦ ଜଣ ନବଜାତ ଶିଶୁଙ୍କ ମୃତ୍ୟୁ ପରେ ସ୍ୱାସ୍ଥ୍ୟ ବିଭାଗ ଏବଂ ଜିଲ୍ଲା ପ୍ରଶାସନ ପକ୍ଷରୁ ଘଟଣାର ତଦନ୍ତ ଆରମ୍ଭ ହୋଇଛି ।
ହସ୍ପିଟାଲ କର୍ତ୍ତୃପକ୍ଷ ସ୍ୱାସ୍ଥ୍ୟ ବିଭାଗକୁ ଏନେଇ ଏକ ରିପୋର୍ଟ ପଠାଇଛନ୍ତି । ସେହିପରି ଜିଲ୍ଲା ପ୍ରଶାସନ ମଧ୍ୟ ଅଲଗା ଭାବେ ରିପୋର୍ଟ ମାଗିଛି । ଗୁରୁବାର ଅତିରିକ୍ତ ଜିଲ୍ଲାପାଳ ମେଡିକାଲ କଲେଜର ଅଧିକାରୀଙ୍କ ସହ ଏକ ବୈଠକ କରିଥିଲେ ।
ଗୋଟିଏ ମାସ ମଧ୍ୟରେ କିପରି ନବଜାତ ଶିଶୁଙ୍କ ମୃତ୍ୟୁ ସଂଖ୍ୟା ୭୫ ପାର କଲା, ସେନେଇ ପ୍ରଶାସନ ତଦନ୍ତ କରୁଛି । ହସ୍ପିଟାଲ ପରିଚାଳନା ପକ୍ଷରୁ ବୈଠକରେ କିଛି ପ୍ରସଙ୍ଗ ଉଠାଯାଇଛି, ଯାହାକୁ ବିସ୍ତୃତ ରିପୋର୍ଟରେ ସାମିଲ କରାଯିବ । ଶିଶୁମାନଙ୍କୁ ହସ୍ପିଟାଲରେ ଭର୍ତ୍ତି କରିବା ପରେ ଚିକିତ୍ସା ପ୍ରକ୍ରିୟା, ସେମାନଙ୍କ ସ୍ୱାସ୍ଥ୍ୟାବସ୍ଥା ଏବଂ ଚିକିତ୍ସାରେ କୌଣସି ସ୍ତରରେ ତ୍ରୁଟି ରହିଥିଲା କି ନାହିଁ, ତାହାର ମଧ୍ୟ ଯାଞ୍ଚ କରାଯିବ ।
ଏହି ମୃତ୍ୟୁ ପଛରେ ଚିକିତ୍ସା ସମ୍ବନ୍ଧୀୟ କାରଣ ବ୍ୟତୀତ ଅନ୍ୟ କୌଣସି କାରଣ ରହିଛି କି ନାହିଁ, ସେନେଇ ମଧ୍ୟ ତଦନ୍ତ କରାଯିବ । ରିପୋର୍ଟ ଆଧାରରେ ପରବର୍ତ୍ତୀ କାର୍ଯ୍ୟାନୁଷ୍ଠାନ ନିଆଯିବ । ଏଭଳି ଘଟଣା ରୋକିବା ପାଇଁ ନୂଆ ଗାଇଡଲାଇନ୍ ମଧ୍ୟ ପ୍ରସ୍ତୁତ କରାଯାଉଛି ।
ମାଲଦା ମେଡିକାଲ କଲେଜକୁ ଆଖପାଖ ଜିଲ୍ଲା ସହ ବିହାର ଏବଂ ଝାଡ଼ଖଣ୍ଡରୁ ମଧ୍ୟ ଗୁରୁତର ଅବସ୍ଥାରେ ଥିବା ନବଜାତ ଶିଶୁଙ୍କୁ ରେଫର କରାଯାଇଥାଏ । ଗୋଟିଏ ଦିନରେ ମୃତ୍ୟୁ ହୋଇଥିବା ୧୦ ଜଣ ନବଜାତଙ୍କ ମଧ୍ୟରୁ ୮ ଜଣ ଅନ୍ୟ ହସ୍ପିଟାଲ ଏବଂ ନର୍ସିଂ ହୋମରୁ ରେଫର ହୋଇ ଆସିଥିଲେ ।
ମେଡିକାଲ ସୁପରିଣ୍ଟେଣ୍ଡେଣ୍ଟ ଡାକ୍ତର ପ୍ରସେନଜିତ କୁମାର ବାର କହିଛନ୍ତି ଯେ, ସମସ୍ତ ଶିଶୁଙ୍କୁ CCUରେ ଚିକିତ୍ସା ଦିଆଯାଇଥିଲା । କିନ୍ତୁ ସେମାନଙ୍କ ଅବସ୍ଥା ଅତ୍ୟନ୍ତ ଗୁରୁତର ଥିବାରୁ ସେମାନଙ୍କୁ ବଞ୍ଚାଇବା ସମ୍ଭବ ହୋଇନଥିଲା ।
