କୋଲକାତା: ହକର ଉଚ୍ଛେଦ ବିରୋଧରେ ଟିଏମସି ପକ୍ଷରୁ ବିଶାଳ ପ୍ରତିବାଦ । କୋଲକାତାରେ ଉଚ୍ଛେଦକୁ ବିରୋଧ କରି ପଶ୍ଚିମବଙ୍ଗର ପୂର୍ବତନ ମୁଖ୍ୟମନ୍ତ୍ରୀ ଓ ତୃଣମୂଳ କଂଗ୍ରେସ (ଟିଏମସି) ସୁପ୍ରିମୋ ମମତା ବାନାର୍ଜୀ ବୁଧବାର ହଜାର ହଜାର ହକର, ସମର୍ଥକ ଓ କର୍ମୀଙ୍କ ସହ ଏକ ବିଶାଳ ପଦଯାତ୍ରାର ନେତୃତ୍ୱ ନେଇଥିଲେ। ରାଜ୍ୟରେ ଚାଲିଥିବା ଦୋକାନ ଓ ଫୁଟପାଥ ବ୍ୟବସାୟୀ ଉଚ୍ଛେଦ ଅଭିଯାନକୁ ବିରୋଧ କରି ହଜାର ହଜାର ହକର, ସମର୍ଥକ ଏବଂ ଟିଏମସି କର୍ମୀ ଏହି ପ୍ରତିବାଦ ରାଲିରେ ସାମିଲ ହୋଇଥିଲେ। ରାଜ୍ୟରେ ଚାଲିଥିବା ଫୁଟପାଥ ଓ ଅବୈଧ ଦଖଲ ହଟାଇବା ଅଭିଯାନକୁ ବିରୋଧ କରି ଏହି ପ୍ରତିବାଦ ହୋଇଛି। ସୂଚନାଯୋଗ୍ୟ ଯେ, ମେ ୨୦୨୬ରେ ଅନୁଷ୍ଠିତ ପଶ୍ଚିମବଙ୍ଗ ବିଧାନସଭା ନିର୍ବାଚନରେ ବିଜେପି ବଡ଼ ବିଜୟ ହାସଲ କରିଥିଲା l ୧୫ ବର୍ଷ ଧରି କ୍ଷମତାରେ ଥିବା ଟିଏମସି ସରକାରକୁ ହଟାଇ ଦେଇଥିଲା। ଶୁଭେନ୍ଦୁ ଅଧିକାରୀଙ୍କ ନେତୃତ୍ୱରେ ନୂଆ ସରକାର ଗଠିତ ହୋଇଥିଲା। ନୂତନ ସରକାର ରାଜ୍ୟର ବିଭିନ୍ନ ସ୍ଥାନରେ ଅବୈଧ ଦଖଲ ଓ ଫୁଟପାଥ ଅତିକ୍ରମଣ ହଟାଇବା ପାଇଁ ଜୋରଦାର ଉଚ୍ଛେଦ ଅଭିଯାନ ଆରମ୍ଭ କରିଛି। ହାୱଡା ଷ୍ଟେସନ, ନ୍ୟୁ ମାର୍କେଟ ସହ ବିଭିନ୍ନ ବ୍ୟସ୍ତ ବାଣିଜ୍ୟିକ ଅଞ୍ଚଳରେ ପ୍ରଶାସନ ପକ୍ଷରୁ ଚାଲିଥିବା ଉଚ୍ଛେଦ ଅଭିଯାନ ହଜାର ହଜାର ଛୋଟ ବ୍ୟବସାୟୀ ଓ ହକରଙ୍କ ଜୀବିକାକୁ ପ୍ରଭାବିତ କରିଥିବା ଅଭିଯୋଗ ହୋଇଛି। ମମତା ବାନାର୍ଜୀ ପଦଯାତ୍ରା ସମୟରେ ହକରମାନଙ୍କ ସହ ଚାଲି ସେମାନଙ୍କ ପକ୍ଷରେ ଆବାଜ ଉଠାଇଥିଲେ। ସେ କହିଥିଲେ ଯେ, ସାଧାରଣ ଓ ଛୋଟ ବ୍ୟବସାୟୀ ଓ ହକରମାନଙ୍କ ଜୀବିକାକୁ ଧ୍ୱଂସ କରିବା କୌଣସି ସରକାରଙ୍କ ପାଇଁ ଉଚିତ ନୁହେଁ। ଅନ୍ୟପକ୍ଷରେ ବିଜେପି ଏହି ପ୍ରତିବାଦକୁ ଏକ ରାଜନୈତିକ ନାଟକ ବୋଲି କହିଛି। ଦଳ କହିଛି ସହରର ଯାତାୟାତ ସୁବିଧା ଓ ସର୍ବସାଧାରଣ ସ୍ଥାନ ମୁକ୍ତ କରିବା ପାଇଁ ଏହି ଉଚ୍ଛେଦ ଆବଶ୍ୟକ। ବିଜେପି ଏହାକୁ ରାଜନୈତିକ ଉଦ୍ଦେଶ୍ୟ ପ୍ରେରିତ ଆନ୍ଦୋଳନ ବୋଲି ଅଭିଯୋଗ କରିଛି। ପୂରା କାର୍ଯ୍ୟକ୍ରମ ଶାନ୍ତିପୂର୍ଣ୍ଣ ଭାବେ ଶେଷ ହୋଇଥିବାବେଳେ, ଏହି ପ୍ରସଙ୍ଗ ଆଗାମୀ ଦିନରେ ରାଜ୍ୟ ରାଜନୀତିରେ ଆଉ ଅଧିକ ତାପମାତ୍ରା ସୃଷ୍ଟି କରିପାରେ
